लक्ष्मीपूजन निमित्त 'मुहूर्त ट्रेडिंग' ला सकारात्मक प्रतिसाद

NewsZenn Nov 15, 2020 879 0

गुंतवणूक बाजारात तेजी

लक्षमीपूजनाच्या मुहूर्तावर 'मुहूर्त ट्रेडिंग' ची परंपरा गेली कित्येक दशके चालू आहे. मुहूर्तावरील शेअर बाजारातील ही खरेदी फलदायी मानली जाते. त्यामुळे दिवाळीच्या सुट्ट्या असूनही लक्ष्मीपूजनला मुहूर्तावर बाजार एक तास सुरु ठेवला जातो.

कोरोना च्या पार्श्वभूमीवर बाजारात जवळ जवळ आठ महिन्यानंतर तेजी पाहायला मिळाली. दसऱ्यापासून बाजारात उत्साहाचे वातावरण आहे. दिवाळीच्या आठवडाभर आधीपासून शेअर बाजार तेजीत आहे. आज लक्ष्मीपूजनाच्या मुहूर्तावर शेअर बाजार काही काळ उघडण्यात येतो. 'मुहूर्त ट्रेडिंग' ला मोठ्या प्रमाणावर प्रतिसाद मिळाला.बऱ्याच कालावधीनंतर बाजारात तेजीचे वातावरण पाहायला मिळाले. आज मुहूर्तावर खरेदीचा उत्साह पाहता आज सेन्सेक्स ने उसळी घेत ४३६३७ वर स्थिरावला.
भारतीय शेअर बाजारात दिवाळीच्या मुहूर्तावर 'मुहूर्त ट्रेडिंग' चे महत्व खूप मोठे आहे. भारतीय बाजारपेठेत दिवाळीनिमित्त कोट्यवधी रुपयांची उलाढाल होत असते. दिवाळसण हा सर्वसामान्य माणसांपासून ते व्यापाऱ्यांपर्यन्त सर्वांसाठी मोठ्या उत्साहात साजरा केला जातो. लक्ष्मीपूजनाच्या निमित्ताने मुहूर्तावर ऑनलाईन ट्रेडिंग व सोने गुंतवणूक करून गुंतवणुकीचा श्रीगणेशा केला जातो. व्यापारी वर्गात चोपडी पूजन केले जाते. लक्ष्मीपूजनाचा हा मुहूर्त व्यापारी वर्गासाठी महत्वाचा असतो. दिवाळीच्या मुहूर्तावर सर्व स्टॉक मार्केट, बाजार बंद असतो पण लक्ष्मी पूजनाच्या दिवशी तासाभरासाठी मुहुर्तावरील ट्रेडिंग करण्यासाठी बाजार चालू करण्याची परंपरा आहे. BSE मध्ये हि परंपरा १९५७ पासून सुरु आहे तर NSE मध्ये १९९२ पासून सुरु आहे. मोठ्या प्रमाणात गुंतवणूक या काळात केली जाते. यंदाच्या वर्षी ६. १५ ते ७.१५ या काळात मुहूर्तावरील ट्रेडिंग पार पडले. यावर्षी दिवाळीवर कोरोनाचं सावट असल्यानं गुंतवणुकीवर त्याचा परिणाम होईल का अशी भीती होती पण, मोठ्या प्रमाणावर गुंतवणूक झाली. दीर्घकालीन स्टॉक खरेदी करण्याकडे गुंतवणूकदारांचा कल होता. या मुहूर्तावर गुंतवणूक करणं फायद्याचं असत असं मानलं जातं म्हणून पहिल्यांदा ट्रेडिंग अथवा गुंतवणूकदार याच दिवसाची निवड करतात. त्यामुळे एकूणच बाजारात लक्ष्मी पूजनाच्या मुहूर्तावर सकारात्मक वातावरण पाहायला मिळाले.